Sýningar

Sýning á tveimur ljósmyndaseríum eftir Ólaf Elíasson, Cars in rivers, 2009 og Jökla series, 2005 í Listasafni Íslands opnar 16. september og stendur til 7. nóvember.

Ljósmyndasýningin Imported Landscape eða Innflutt landslag verður opnuð í Listasafni Íslands þann 16. september og stendur til 7. nóvember.

Sýningin Thomsen & Thomsen sem staðið hefur yfir í Ljósmyndasafni Reykjavíkur í sumar verður framlengd til 12. september n.k.

Karl R. Lilliendahl opnar ljósmyndasýningu á Mokka á Skólavörðustíg föstudaginn 20. ágúst. Karl nefnir sýninguna Secondo, en á henni gefur að líta mannlífsmyndir frá ítölsku borgunum Lucca, Bologna og Feneyjum. Titill sýningarinnar er vísun í sekúndubrotið sem það tekur ljósmyndarann að fanga augnablikið. Þetta er sjöunda einkasýning Karls. Hann hélt sína fyrstu ljósmyndasýningu á Íslandi haustið 2007 og hefur sýnt víða um heim, meðal annars haldið fjórar sýningar í Svíþjóð. Sýningin stendur til 23. september og er opin daglega frá klukkan 9 til 18.30.

Ásýningunni Sögustaðir – í fótspor W.G. Collingwoods má sjá ljósmyndaverk eftir Einar Fal Ingólfsson, sem unnin eru með hliðsjón af vatnslitamyndum, teikningum og ljósmyndum sem breski myndlistarmaðurinn og fornfræðingurinn William Gershom Collingwood málaði og tók af stöðum sem koma fyrir í Íslendingasögunum á tíu vikna ferðalagi um Ísland sumarið 1897. Sýningin er hluti af Listahátíð í Reykjavík 2010.

Á Minjasafninu á Akureyri stendur yfir ljósmyndasýningin   „FJÁRSJÓÐUR – tuttugu ljósmyndarar frá Eyjafirði 1858-1965“ Sýningin er afrakstur rannsókna Harðar Geirssonar, safnvarðar Minjasafnsins, á ljósmyndaarfi Íslendinga. Uppgötvunum hans á ferðalaginu um leyndardóma ljósmyndanna má líkja við litla eðalsteina sem saman mynda FJÁRSJÓÐ.